Undanfari frásagnar af......

...Danmerkurferð Kvisthyltinga, vaxandi ungfrú og vægu (eða stórkostlegu, eða engu)  menningarsjokki.

Það er ekki amalegur kokteill sem bíður lesenda undir helgi, þegar tími gefst mögulega til að gera þessu öllu skil. 

Þegar má finna úttekt hér, og hér.

Mín verður án efa toppurinn á kökuna, en.... bíðum og sjáum.

Spegilmynd með gati

Það kom um það formleg tilkynning í dag að sérsniðinn Seðlabankaspegillinn sé tilbúinn og bíði þess að ég nálgist hann. Það er ekki svo, að hann sé kúptur eins og ég gerði tillögu um í síðustu færslu á þessari eðalsíðu. Ég reikna með, miðað við framkvæmdahraðann hingað til, að hann verði kominn upp fyrir hvítasunnu. Það þarf nefnilega að hugsa sig vel um áður en svona gagn er sett á vegg og að mörgu að hyggja. Vissulega er ég kominn með frumhugmyndir um framkvæmdina, sem miða að því að dýrindið brotni ekki, en betur má ef duga skal.

Að öðru leyti kemst maður ekki hjá því þessa dagana, að spegla sig í þeim hörmulegu spegilmyndum sem dregnar eru upp af 'slæmri stöðu heimilanna og fyrirtækjanna.' Þetta eru orðnar svo ómerkilegar klisjur og útjaskaðar, að ég er farinn að ranghvolfa augunum af leiðindum í hvert skipti sem þær ber á góma. Mig er farið að svíða í augum af öllu ranghvolfinu. Í öllu orðagjálfrinu er alltaf skilið eftir gat, svona alveg eins og verður í nýja, fína speglinum. Ég veit til hvers spegilgatið er, og jafnvel líka umræðugatið. Það gat snýst um það, nákvæmlega: hvernig við stöndum, hvað þurfum við til að komast úr úr þessu og hverjir fá makleg málagjöld? Ég verð ekki sáttur fyrr en ég tel fullvíst að þeir sem bera ábyrgðina þurfa að svari til saka.

Úpps - ég hóf þetta með það að markmiði að vera léttur og kátur í málflutningi, en það reynist víst ansans, ári erfitt þessa dagana. Það virðist enginn vita neitt hvað verður og þá er gripið til þess að tala í klisjum.

Það liggur við að maður vorkenni aumingja íhaldinu ómögulega stöðu, en það gerir maður bara hreint ekki. Það þarf dálítið mikið meira til.

Framundan er fermingarferð, sem var keypt áður en K skall á. Það verður fróðlegt að kynnast fermingarsiðum þarlendra svo ekki sé talað um umtalsverða tilhlökkun að hitta smákonu nokkra og foreldra hennar, sem koma til til móts við Kvisthyltinga.

Framundan sýnist að sjái

hjá Siggu' og Sighvati

sérlega fallega skjái

og spegil með gati.

Þessi hjón geta verið hvaða hjón sem er, svona eins og Jón og Jóna.

Í sviðsljósinu

fD hefur lýst ákveðnum efasemdum um, að nýjasta viðbótin við Seðlabankann sé í samræmi við þarfir.

"Þetta er eins og í leikhúsi!"

Ég er auðvitað ekki sammála þessari lýsingu þar sem ég rakst á þessi fínu ljós á útsölu hjá þessari fínu ljósabúð. Þar fyrir utan, ef maður vill samlíkingu við leikhúsið, þá er það bar fínt.

Eins og gengur og gerist á þessum bæ, er ekkert verið að rasa um ráð fram í framkvæmdum, en þegar valið stendur á milli þess, að fara yfir helling af fremur lítið óleiðinlegum verkefnum nemenda og að tengja lýsinguna sem að ofan er greint frá, þarf enginn að efast um niðurstöðuna: ég skellti mér í rafvikjun í gær og er lifandi í dag, en það segir ekkert annað en það að ég fór mér ekki að voða við verkið. 

Upp eru  komin ljósin, sem ætlað er að varpa birtu á hvern þann, sem vill sjá spegilmynd af fegurð sinni, eða hverju því sem við kann að blasa þegar ljósaflóðið skellur á. Þarna hverfa allar afsakanir fyrir því að geta ekki gert sig eins fínan og flottan og efni standa til. Ekkert verður falið, engir skuggar, allt blasir við, öllu eru gerð skil.

Ég er að velta því fyrir mér hvort ekki sé rétt að endurskoða pöntun á sérsniðnum speglinum sem þarna á síðan að verða punkturinn yfir i-ið. Það gæti verið hugmynd, til að fullnýta lýsinguna, að fá þarna upp kúptan spegil, sem myndi gefa áhugasömum færi á að skoða hvern einstakan fílapensil og fylgjast síðan daglega með þróun hans.

Um leið og ljósið leikur um það sem það er beint að, flæðir frá því hiti leikúskastaranna og húðin opnast og hárið mýkist og allt verður meðfærilegra. Það er engu líkara en maður liggi á sólarströnd í suðrænu landi.

Ef það er eitthvað, sem ef til vill mætti betur fara er, að þegar ljósaflóðið skellur framan í mann þá sér maður nánast ekki það sem við blasir í speglinum, sem getur verið jákvætt ekki síður en neikvætt.

Í ljósbaði læt ég mig dreyma

um ljúfar stundir .

Held þá um heima og geima

með höku undir.

-þetta er dýrt

Aðferðin sem ég notaði....

...við að kjósa í dag var harla einföld:

Fyrst tók ég frá það sem engan veginn kom til greina:

- eitt framboð sem er þess eðlis  að ég hefði talið líklegra að ég gengi fyrir björg en stimpla stafinn þess á seðilinn sem ég hafði til að kjósa á.

- eitt framboð sem er einhversstaðar langt út úr öllu samhengi við raunveruleikann sem við lifum og álíka líklegt að finna krækiber í helvíti og að það fyrirbæri nái inn manni - því atkvæði kastað á glæ, engum til gagns.

- eitt framboð sem virðist helst fá fylgi þeirra sem eru eitthvað ósáttir við það fyrst nefnda og virðist þar að auki ekki líklegt til stórra afreka.

- eitt framboð sem er ekki neitt neitt neitt neitt - atkvæði út um gluggann.

- eitt framboð sem sem sjálfsagt man fífil sinn fegri en sökk ofan í spillingar og fjárglæfrafenið og er þar enn þrátt fyrir tilraun til að klæða sig í ný föt. 

Þá eru tvö framboð eftir og ég verð að viðurkenna, að ég hef svo sem ýmislegt að athuga við þau bæði. Þau eiga það samaeiginlegt, að bæði eru höfuðandstæðingar þess fyrst nefnda að ofan og það er jákvætt. Mitt atkvæði skyldi ég nota þannig, að það væru líkur á að það nýttist gegn því hörmungarfyrirbæri sem þessi þjóð þarf að burðast með.

Þegar ég var búinn að vega og meta þessi tvö framboð á ýmsum forsendum varð niðurstaðan sú, að ég kaus.................

x

x

x

x

x

x

x

x

x

x

x

x

x

x

x

A N N A Ð   Þ E I R R A 

- he he

Ekki það að flestir þeir sem þekkja mig viti ekki nokkurn veginn hvorum megin hjarta mitt slær.

Sálarsala?

Ungur samverkamaður sagði við mig í dag að hann væri sterklega og í alvöru, að velta fyrir sér að skrá sig í tiltekinn stjórnmálaflokk og tryggja þar með örugga framtíð sína og framgang ínnan stjórnkerfisins. (Hann er harður andstæðingur flokksins, hinsvegar)

Aðgerð af þessu tagi tel ég að jafngildi því að selja sál sína og til slíks hef ég ekki geð. Ef mönnum er ekki annt um sálarheill, þá er þetta valkostur.

Góð ráð:

Að lokum, fyrir þau ykkar sem enn hafið viku til að ákveða ykkur: 

Lesið endilega umfjöllun mína um framboðin, sem ég birti hér fyrir nokkru. Gætið þess bara, að lesa allar þeirra nema tvær meða algerlega öfugum formerkjum, þá mun valið verða ykkur auðvelt.

Hrossahlátur á páskadag

Ég var sendur í enn eina ferðina til að ná góðri mynd af snoppunni á þeim rauðnösótta á þessu ágæta páskadegi. Myndaði í gríð og erg þar til fyrirsætan var farin að velta fyrir sér hverju þetta sætti. Eigum við ekki bara að hafa það svo, að hún hafi spurt mig beint og að ég hafi gert grein fyrir því að þetta væri allt í þágu listarinnar.

Það skipti allavega engum togum, sá rauðnösótti rak upp hrossahlátur og ætlaði aldrei að hætta. Svo endaði hann á því að reka út úr sér tunguna á þetta allt saman.

Það virðist ljóst af þessum myndum, að ekki er vanþörf á á fara að huga að tannhirðunni.

Ég hef fengið staðfestingu á því að hér er um að ræða Þann Rauðnösótta.

Páskavor

"Hvað á að klippa mikið af þessu?"
"Er ekki best að þú ákveðir það?"
"Mér finnst að það þurfi að vera sameiginleg ákvörðun."
"Taka bara vel af því."
"Hvað er það mikið?"
"Bara...."

Það sem hafði gerst áður en þetta samtal átti sér stað var, að fD hafði orð á því, þar sem ég sat í rólegheitum að fylgjast með óförum íhaldsins á allskyns .is vefsvæðum, að það þyrfti að fara að snyrta runna og tré. Það hefur væntanlega umlað eitthvað í mér, en það næsta sem ég sá til frúrinnar var, að hún kom neðan úr kjallara klyfjuð klippum og útiverubúnaði og stefndi út í garð og lokaði útidyrunum á eftir sér.

Nokkru síðar opnuðust dyrnar aftur, ég í miðju kafi að lesa um hvað Guðlaugur Þór væri í vondum málum, og samtalið átti sér stað. Í lok þess gerðist hið óhjákvæmilega: ég yfirgaf vefheima og hélt út í vorið, þar sem ég síðan dvaldi við trjáklippingar drjúga stund. Ég klippti þetta allt meira og minna niður, án þess að sérstakar athugasemdir væru gerðar við það. 

Vissulega hafði ég í huga orð fD sem fallið höfðu síðastliðið sumar eftir aðgerðir í trjáklippingum á þessum bæ og sem ekki féllu í besta hugsanlegan jarðveg. Einnig orð sem féllu á útmánuðum þegar lítilsháttar umræða átti sér stað um fyrirhugaða snyrtingu á trjágróðrinum: "Ég treysti þér eiginlega ekki til að klippa runnana!"

Þessi aðgerð gekk sem sagt upp og eftir standa fallegir, ólaufgaðir runnarnir, tilbúnir að gera sitt til að fegra umhverfi sem er eiginlega fegurra fyrir, en orð fá lýst.

Nú er páskadagsmorgunn, sem hófst með bakstri sem fD átti frumkvæði að, en ég framkvæmdi, þar sem ég var sneggri að koma mér framúr. Það var ekki slæmt að eyða drjúgum hluta morguns í að snæða nýbakað brauðið með sérvöldu áleggi að vild. Á meðan missa útsofandi páskagestirnir, sem eru náttúrulega engir gestir, bara á-Íslandi-verandi Kvistholtsbörnin, og missa af því að fá brauðið volgt úr ofninum.

Framundan er messulaus dagur sem ber í sér vonina um vorið sem er á næsta leyti. Það er kannski svalt utandyra, en það er íslenskur svali, alveg eins og hann á að vera.

Þar sem nú er dagur málsháttanna:

Eigi skal hönd lyfta fyrr en lyft er hönd.

Megið þið njóta páskahátíðarinnar eins og ykkur finnst best.

Sex í sveit - a la Bisk

Fyrst og fremst finnst mér að virðingarvert að fólk skuli leggja það á sig, af áhuganum einum saman, að setja upp leikrit hér í sveit ár eftir ár. Ég veit það hinsvgar af fyrri reynslu minni og þátttöku í svona löguðu, að fyrir þetta fólk snýst þetta hreint ekki um kvöð, heldur einskæra ánægju; skemmtunin er ekki síður þeirra en okkar hinna sem fáum að fylgjast með afrakstrinum.

Heimaverandi Kvisthyltingar gerðu sér ferð í leikhús í gærkvöld. Leikdeild Umf. Bisk. sýnir þessa dagana hinn vel þekkta farsa: 'Sex í sveit'.

Eins og farsa er siður gengur þarna allt með einhverjum ólíkindum - söguþráðurinn er snúinn og undinn einhvernveginn utanum um hið vinsæla og klassíska þema, sem framhjáhald er.

Skemmst er frá að segja að þetta var hin ágætasta skemmtun og eins og vill verða við þær aðstæður þar sem maður þekkir alla leikendur meira og minna, eykur það umtalsvert við skemmtanagildið.

Frammistaða leikendanna var auðvitað misjöfn, en alltaf nógu góð. Besta valdið að farsatöktum fannst mér þau hafa, Sigurjón Sæland og Íris Blandon, en þetta svið leiklistarinnar er ekki hið auðveldasta að takast á við.

Þá fannst mér sérlega gaman á sjá Bjarna á Brautarhóli í hlutverki kraftajötuns.

Skemmtilegt hve margir lögðu leið sína í Aratungu í gærkvöldi.

Lítið eða stórt líf

Það er einkennilegt, en þó ekki, að mikilvægi lífs er afstætt. Sumir mundu segja, að sumt líf sé mikilvægara og rétthærra en annað, en þá hljóta þeir alltaf að vera að miða við sjálfa sig.

Það líf sem stendur þér næst er þér alltaf mikilvægast, óháð því hvers eðlis það líf er.

Tumi var bara fugl og nú er lífi hans lokið og hann hefur fengið virðulega útför í samræmi við tengsl þau sem hann hafði við mannfólkið sem annaðist hann og naut góðs af lífi hans.

Tumi hvílir nú í Sigrúnarlundi í Kvistholti.

Sá rauðnösótti? ... ætli það

Það var enn gerð tilraun til að finna þann rauðnösótta. Þarna var hrossahópur og allt meira og minna eins. Ég ákvað að taka nokkrar myndir af nösum, en á ekkert sérstaklega von á að ég hafi haft árangur sem erfiði.

Vektorabrú

Já, ekki er það amalegt!

Allt í volli.....sumu reddað

Þetta er búinn að vera dagur hinna ýmsu átaksmála sem öll miða að því að gera lífið eða tilveruna betri en er(u). Allt þetta kostaði umtalsverða skipulagningu þar sem við sögu kom mannfólk, fugl og farartæki. 

Upphaflegt tilefni höfuðborgarferðar var framhald augasteinsútskiptingar gamla unglingsins, en honum var nauðsynlegt að kíkja til augnlæknis þar er sjónin hafði eðlilega breyst. Þessi liður ferðarinnar var löngu skipulagður og til hans voru væntingar þó nokkrar og líklega nokkru meiri en niðurstaðan síðan leiddi í ljós. Það mál á eftir að kosta nokkra umræðu. 

Til að nýta ferðina var tekin sú ákvörðun, af gamla unglingnum að mestu, en að nokkru fyrir áeggjan fD, að sinna eðlilegu smurviðhaldi bifreiðar þess fyrrnefnda, sem er af gerðinni Subaru. Pantaður hafði verið tími á viðeigandi smurstofnun fyrir allnokkru síðan. Þegar það var gert lá fyrir, að verðandi stúdent á heimilinu var kominn fram yfir á tanngarðaeftirliti. Það þótt því upplagt að koma málum þannig fyrir að ferðin nýttist honum til tannsaferðar jafnfram því sem hún nýttist til þess að koma ofangreindri bifreið til smurs.

Það gerðist síðan í gær að höfuðborgarangi fjölskyldunnar essemmessaði áhyggjur sínar af heilsufari fóstursonarins, Tuma Egilssonar. Hún hafði þá þegar orðið sér úti um það álit kunnáttumanns, að hann ætti hugsanlega ekki langt eftir.  Það varð úr að ferðin skyldi nýtt til þess að flytja viðkomandi til þar til hæfs læknis, sem var ekki síður flókið þar sem uG þurfti að sinna vinnu í dag.

Skemmst er frá því að segja, að allt skipulag dagsins gekk fullkomlega eftir, enda enginn viðvaningur í skipulagsmálum á ferð.

Það eina sem ekki var leitað leiða til að laga, og sem ekki er í viðunandi lagi, var bak þess sem þetta ritar og þrálátt ólag á heilsu fósturmóðurinnar. Þrálátur verkurinn lét engan bilbug á sér finna og gerir ekki enn og það sama má segja um ástand uG.

Niðurstaða dagsins var þessi:

Augnamál gamla unglingsins eru í lítilsháttar biðstöðu. Fyrir liggur að taka ákvörðun um hvort og þá hve mörg gleraugu verða keypt.

Subaru fékk sína yfirhalningu og telst nú í góðu standi.

Fuglinn Tumi fór til læknis þar sem hann fékk ekki þann dóm að öllu væri lokið. Etv getur breytt mataræði og einhverjir mér ókunnugir dropar vegna ónæmiskerfis snúið heilsufarinu á réttar brautir.

HB fékk tannayfirferð og var útskrifaður með láði.

Þessi hérna er áfram með leiðinda bakverkinn.

UG berst enn við pestina.

Tvö mál af sex afgreidd með vel fullnægjandi hætti

Tvö mál af sex eru í nokkurri biðstöðu.

Tvö mál af sex hafa ekki hlotið neina athygli eða meðferð.

Það verð ég að segja' eins og er,

að allmjög var dagurinn snúinn.

En hinsvegar reyndist hann mér

hreint ekki frekar þungbúinn.

Hvernig velur maður? (4)

Ekki hvarflar að mér að skilja lesendur eftir með þá grillu í höfðinu, að ég ætli mér ekki að leita jákvæðra ástæðna fyrir því að kjósa aðra flokka, hreyfingar eða framboð, en þau sem þegar hafa verið kynnt til sögunnar. Á þessum degi mun ég gera grein fyrir því hversvegna ef til vill er ástæða til að kjósa 2 framboð til viðbótar og þá verða þau orðin átta, sem kynnt hafa verið, en 7 sem eftir standa.

Ég verð að viðurkenna að sú ákvörðun Tungnamannanna tveggja sem voru leiðandi innan L-listans um að hætta við framboðið, var óleikur í minn garð, þar sem ég hafði lagt ómælda vinnu í að tína fram ástæður fyrir því, að ljá listanum atkvæði. Sú vinna er nú fyrir bí, en ég verða samt að vera jákvæður.

BORGARAHREYFINGIN (O)

1. Mér finnst það hreint út sagt fallegri hugsun en orð ná að lýsa, að stjórnmálahreyfing skuli ætla að leggja sig niður þegar hún hefur náð markmiðum sínum.

2. Ég get ekki annað en hlakkað til að geta farið að taka þátt í að semja nýju stjórnarskrána. Þar mun ég sannarlega ekki láta mitt eftir liggja. Ég sé líka fyrir mér, að stórir skarar hinnar upplýstu þjóðar muni leggja sitt ótæpilega af mörkum.

3. Einn megin talsmaður hreyfingarinnar sótti einu sinni um skólameistarastöðu í ML. Bara það að hafa áhuga á svo áhugaverðum stað, segir meira en mörg orð.

4. Efnahagshrunið verður rannsakað ofan í kjölinn með trúverðugum hætti. Dásamleg hugsun og til sóma. Þessi þjóð verður í fjötrum þar til fyrir liggur hvað gerðist, hver olli og hverjir þurfa að sæta ábyrgð og hver ábyrgðin verður,

5. Það er óendanlega góð hugsun, að hreyfingin á enga sögu og byrjar nú göngu sína undir merkum allst þess góða sem við viljum að gerist.

6. Merki hreyfingarinnar er afar skemmtilegt.

LÝÐRÆÐISHREYFINGIN (P)

1. Þessi hreyfing er eitthvað það framsýnasta fyrirbæri sem Ísland hefur eignast.

2. Ég vel hiklaust þá sem munu stuðla að því að það komi hraðbanki í Laugarás.

3. Ég get ekki annað en dáðst að því hve forystumaður hreyfingarinnar kemur alltaf vel fyrir, er jákvæður og málefnalegur í málflutingi sínum. Klassamaður, enda afar reyndur í framboðsmálum og þjóðin hefur reynst hafa trú á honum.

4. Loksins, loksins, er kominn vettvangur fyrir mig til að bjóða mig fram til forystu á vettvangi Alþingis, þar sem ég get síðan tekið við lagafrumvörpunum sem þjóðin sendir mér í gegnum hraðbankana.

5. Ég á bara  erfitt með að tjá mig yfirvegað um allt það sem ég tel vera jákvætt við þessa hreyfingu fólksins í landinu.

6. Listabókstafurinn er eiginlega punkturinn yfir i-ið - ekki spurning: xP

--------------------------------------

Ekki veit ég hvort áframhald verður á allri þessari jákvæðni minni. Það er allt eins líklegt að næst ákveði ég að finna þessum framboðum allt til foráttu. Það er svo sem harla auðvelt. Þangað til bið ég fólk að vera jákvætt og láta sig hlakka til að negla þetta lið í kosningunum eftir nokkrar vikur.

Enn af Skálholtsdómkirkju

Okkur varð ekki um sel í morgun þegar við héldum til vinnu, en leið okkar liggur framhjá Skálholtsstað. Þegar við komum í beygjuna fyrir utan Laugarás blasti Skálholtskirkja við okkur, eins og venjulega, tignarleg í vesturátt. Eitthvað var ekki eins og það átti að vera. Ég snarhemlaði og stökk út úr bílnum meðan fD sat kyrr, steinilostin og hóf að fara með bænirnar sínar.

Sú sjón sem við blasti, skar í augun eins á und á helgum líkama.

Óknyttafólk virðist hafa tekið sig til og útatað kirkjuna í graffiti. Sem betur fer var ég með myndavélina með mér og tók mynd af ósköpunum. Hana má sjá hér langt fyrir neðan.

Eftir að hafa tekið góðan tíma í að ná áttum, ók ég af stað aftur með fD, enn í hálfgerðu losti við hlið mér, muldrandi guðsorð af ýmsu tagi. Við ákváðum að keyra heim að Skálholti til að kanna málið frekar, en þá tók hreint ekki betra við. Allur vesturgafl kirkjunnar var líka útataður í kroti, og auðvitað smellti ég einni mynd af óskundanum.

Það var enginn kominn á stjá á Skálholtsstað og ég ákvað að raska ekki ró manna þar, enda hefði það ekki breytt neinu úr því sem komið var.

Þegar við komum svo við á heimleiðinni voru mættir menn og byrjaðir að setja upp vinnupalla við báða gafla kirkjunnar.

Ja, svei.

V A R Ú Ð

Það er á þína ábyrgð ef þú flettir neðar.

-------------------------------------------------------

Breyting 2. apríl
Það er engin ástæða til að fletta neðar, þar sem myndirnar af kirkjunni hafa verið fjarlægðar. Ástæða þess er sú, augljóslega, að nú er ekki dagurinn sem var í gær.

Ég hálf vona að þeir hafi ekki verið margir sem sáu ósköpin.