Eldri borgari kaupir skjávarpa (eftirmáli með Ali)

Þetta má heita framhald þessa.

Eftir að ég hafði nú fengið krónurnar sem ég hafði greitt fyrir skjávarpann sem kom svo aldrei, sat ég uppi með krónur, sem hefðu allt eins getað lent annarsstaðar en á mínum bankareikningi. Við þær aðstæður þurfti ég að ákveða hvað gera skyldi við þennan aur. 

  

Ég hafði komist að því, að skjávarpa eins og þann sem ég hafði greitt fyrir hjá Snjallkaupum, var hægt að fá á nákvæmlega helmingi lægra verði á AliExpress. Ágætur peningur fyrir Snjallkaupsmenn að leggja 100% á vöru fyrir það eitt að vera milliliður með staðlaða frasa á íslensku í kynningarefni sínu.

Hvað um það, þarna var ég kominn í nokkurn gír og ákvað bara að nýta endurgreiðsluna til þess að kaupa skjávarpa frá Ali Express. Hann myndi þá ekki gera annað en koma ekki.

Þann 20. september pantaði ég, sem sagt skjávarpa, sem var helmingi dýrari en sá sem ég hafði áður pantað frá Snjallkaupum, eins og verðið var á honum hjá Ali Express. 

Til að útskýra þetta á einfaldan hátt:

Skjávarpi A kostaði tæpar 15.000 kr hjá Snjallkaupum, en 7500 hjá Ali Express.

Skjávarpi B kostaði kr. 15.000 hjá AliExpress - og það var hann sem ég festi kaup á. Þetta var sem sagt merkilegri græja.

Ali lét mig vita af því að það gæti dregist fram í lok desember, að pakkinn næði til mín og því var ég bara rólegur.  Ég upplýsti fD ekki um kaup mín á þessum skjávarpa. Ég þyrfti þá ekki að fara að verja neitt, ef hann kæmi aldrei. 

Mér til óumræðilegrar undrunar fékk ég tilkynningu um það í gær, 8 dögum eftir pöntunina, að skjávarpinn biði mín í póstboxi.   

Þegar framundan var, að ég nálgaðist hann, þótti mér óhætt að upplýsa frúna um stöðu mála. Ekki get ég nú sagt að hún hafi steypt stömpum af fögnuði, en það "slædaði".

Skjávarpinn reyndist vera í póstboxinu, eins og  skilaboð póstsins höfðu gefið til kynna.

Þetta er búið að vera nokkurt ævintýri í hinum óáþreifanlega heimi sem internetið er. Eftir situr spurningin um hvernig þessi skjávarpi getur nú komið að sem bestum notum.

Það hafa komið fram ýmsar áhugaverðar tillögur í því efni - það verð ég að segja, en svo segi ég ekki meira.

Þakkir til ykkar sem lesið hafa. Farið varlega í viðskiptum við vefverslanir.  

 

Eldri borgari kaupir skjávarpa (3)

Þetta er framhald af þessu

Þegar hér var komið var engin leið fyrir mig að rekja eitt eða neitt, með aðra sendinguna afhenta í Kópavogi og hina í Dongguan borg í Kína. Ég stóð því frammi fyrir því, að hætta bara þessu veseni, eða reyna að berjast eitthvað áfram. 

Yrði hið fyrrnefnda niðurstaðan yrði ég að takast á  við tilfinninguna um að hafa látið plata mig og ekkert gert í málinu - látið það yfir mig ganga.

Hið síðarnefnda fólst í því að berjast áfram, sýna þessum andlitslausu kónum hvar Davíð keypti ölið og falla síðan með sæmd, ef á annað borð er hægt að tala um slíkt í þessu sambandi.

Auðvitað valdi ég síðari kostinn, því nú var verulega farið að síga í mig. Við þær aðstæður hlóð ég í enn einn tölvupóstinn til Snjallkaupa og hann var svohljóðandi:

mið., 18. sep., 13:54 This is my last attempt to try to get a response from you about að projector I ordered from you on August 13, 2024. The projector (Order #2497) still hasn't been delivered to me. I got two different tracking numbers from you. Now it has turned out that one of these was the tracking number of a package (DHL tracking number: LR179315267NL) that was delivered to Hugrún in Kópavogur, Iceland on Sept 5. The other (tracking number: RG026125626CN) seems to have been delivered in Dongguan city in China on Sept. 10. This of course means that I can't expect that the projector I bought will ever be delivered to me. As I said in the beginning, this is my last attempt to get a response from you. If there is no satisfactory outcome of this, in the form of a response from you, detailing how and when I will get my projector or a refund of ISK14.680, by this time tomorrow, Sept. 19., I will report your fraudulent behaviour to the appropriate authorities in Iceland. Regards Páll M. Skúlason

.... og hananú. Efnislega fól þessi tölvupóstur í sér nokkurskonar úrslitakosti: Ég gaf Snjallkaupum sólarhring til að koma skjávarpanum af stað til mín eða endurgreiða mér hann að öðrum kosti. Yrðu þeir ekki við þessari kröfu myndi ég tilkynna þá fyrir sviksemi, til viðeigandi yfirvalda hér á landi - eins og það myndi breyta einhverju, svo sem. En þetta gerði ég. Fannst ég allavega hafa reynt að sýna tennurnar, allavega þessar fremstu, sem enn eru upprunalegar.  Ekki átti ég von á að þessi póstur myndi breyta neinu og hélt bara áfram með skjávarpalaust lífið. 

Þennan póst sendi eftir hádegið þann 18. september. Það varð mér talsvert gleðiefni að hann reyndist hafa þau áhrif, að 6 klst síðar fékk ég svar frá Snjallkaupum. Þeir voru þá þarna eftir allt saman. Hér er þessi merkispóstur:

18. sep., 20:31
Thanks for contacting,
We are extremely sorry for the delayed response, we will look into this matter for you. Typically most orders take between 7-21 business days for delivery. We ask for the tracking number that arrived in Iceland, did you contact your local post office about that package to see if they possibly have the package?
Thank you

Efnislega segja þeir í þessum pósti að þeim þyki þetta rosalega leiðinlegt og lofa að skoða málið fyrir mig. Venjulega taki þessar sendingar 7-21 virkan dag að komast á leiðarenda. Svo spyrja þeir hvort ég hafi haft samband við pósthúsið til að athuga hvort pakkinn sé kannski þar, eftir allt saman.

Ég ákvað að nota nóttina til að láta mig dreyma um svarpóst til Snjallkaupa, sem ég sendi síðan árla morguninn eftir:

19. sep. kl. 07:41

Yes, I contacted Pósturinn, as I have already informed you in several attempts to get responses from you.
I suggest you check the emails I have already sent to you concerning this matter. A package with one of the tracking numbers you gave me, has been delivered to a woman by the name Hugrún in Kópavogur, and a package with the other tracking number you gave me, has been delivered to someone in a city in China. Please, read my emails!.
I have done all I can to trace the package and have come to the conclusion that I have been fooled, which is not a good feeling. This is now in your hands .
I give you 24 more hours to either refund the projector or to convince me that the projector is on the way to my address.
Páll M Skúlason

Efnisleg þýðing þessa pósts er, að ég kveðst hafa verið í sambandi við póstinn rétt eins og ég sé búinn að margsegja þeim. Bendi þeim á, að láta verða af því að lesa þessa pósta frá mér.  Ég kveðst vera kominn að þeirri niðurstöðu að þeir væru að hafa mig að fífli, sem ekki sét sérlega skemmtileg tilfinning. Þá segi ég málið vera í þeirra höndum til úrlausnar. Annahvort endurgreiði þeir mér, eða sannfæri mig um að skjávarpinn sé á leiðinni til mín, innan 24 tíma frá sendingu þessa pósts.  Já, ég er svakalegur nagli, eða þannig. 😑 

Fimm tímum síðar kom aftur svar frá Snjallkaupum:

19. sep. kl. 12:52 

We apologize for the confusion, by the looks if it your package got lost in delivery/shipping so we have refunded your order.

Þarna biðjast þeir enn afsökunar og segja pakkann hafa tapast við afhendingu eða flutning. Jafnframt segjast þeir hafa endurgreitt pöntunina.

Þegar hér var komið var það eiginlega ósk mín að fá þetta bara endurgreitt og þar með yrði málið úr sögunni, en ég var nú samt ekkert hættur, eins og ég lét þá vita í svarpósti:

19. sep. 2024, 16:39

Fair enough. You say you "have refunded" the order. What does that mean? To me this means that you have paid me back the ISK14.680 that I paid you for the projector. Have you?

Sem þýðir: Látum svo vera. Þið segist hafa endurgreitt pöntunina. Hvað þýðir það?  Ég skil það svo að þið hafið endurgreitt kr. 14.680 sem ég greiddi fyrir skjávarpann. Er það svo? 

Daginn eftir fékk ég svo senda tilynningu um endurgreiðslu á andvirði skjávarpans, kr. 13.790. Sá var þó hængur á að upp á vantaði kr. 890, sem var sendingarkostnaður og þarna var ég nú kominn í slíkan gír gagnvart þessu, að ég var ekkert tilbúinn að gefa þeim eftir þessar 890 krónur:

20. sep. 2024, 13:50
I will wait and see if this appears on my bank account.
I cannot understand why the amount is ISK13.790 instead og ISK14.680.
I bought and paid for a projector ISK14.680.
I didn't get the projector, but still I lose ISK890. Are you really telling me that I have to pay for the shipping of a package I never got?
For me this is a question of principle, not the amount in question. I still feel entitled to the whole amount, not to mention compensation.
Páll M Skúlason

Efnislega spurði ég þarna hvort ég ætti virkilega að greiða flutningsgjasd af vöru sem ég fékk aldrei. Jafnframt segi ég þetta vera spurningu um grundvallaratriði en ekki upphæðina sem um ræðir. Ég viðurkenna að þetta var nú dálítið illgirnislegt, sem svona var það nú. Ég átti nú ekkert von á því að þeir myndu taka neitt mark á þessu, en það reyndist hreint ekki svo:

20. sep. kl 18:12
Hi!
We apologize for this mistake and will refund the full amount

Enn biðjast þeir afsökunar fyrir mistökin og segjast munu greiða alla upphæðina, mér til nokkurrar undrunar.

20. sep. kl. 18:54 Thank you for your answer.

 

...var svar mitt við þessum pósti og þetta voru jafnframt síðustu samskipti mín við Snjallkaup. Enn trúði ég ekki að þessi upphæð myndi nokkurntíma birtast á reikningnum mínum - þetta væri tapaður peningur, sem ég hafði svo sem allt eins átt von á að yrði, þegar ég hóf þessa vegferð.

Nú er kominn sunnudagsmorgunn, dagurinn er 22. september árið 2024 og ég sé Snjallkaup í allt öðru ljósi en áður. Endurgreiðsla fyrir alla þá upphæð sem ég greiddi fyrir skjávarpann frá Kína, er komin í var, á reikningi mínum.  

Snjallkaup rústuðu orðspori sínu í mínum huga, með 18 daga þögn, sem lauk ekki fyrr en ég fór að hóta, sem er reyndar fjarri mínu eðli.  Á bak við þetta fyrirtæki er örugglega bara fólk sem er að skapa sér lífsviðurværi eins og við öll, en, sem þarf að treysta á aðrar vefverslanir og flutningsþjónustur til að geta veitt viðskiptavinum sínum viðunandi þjónustu.

Ég myndi ráðleggja þeim og öðrum fyrirtækjum sem vilja láta taka sjálf sig alvarlega, að fela sig ekki á bakvið eitt netfang. Það þarf að liggja fyrir heimilisfang, símanúmer og jafnvel nafn eða nöfn.  

Það eru mörg svona fyrirtæki á sveimi núna, t.d. Snilldarkaup og Ofurkaup, sem eru í rauninni bara að taka að sér að þjónusta Íslendinga sem treysta sér ekki til að versla beint við Ali Express.  Sjávarpinn minn, sem Snjallkaup seldi mér á ISK14.680 fæst á Ali Express fyrir ISK7.404 á þessum morgni. 

Nú er það spurningin, þegar peningurinn sem ég var nánast búinn að afskrifa, er kominn aftur: Hvað verður um hann?  Verður ekki að nota hann?

Já, hver veit? 

Bara ég.

 Hér er svo nokkurskonar eftirmáli.

Eldri borgari kaupir skjávarpa (2)

Þetta er framhald þessarar færslu.

Þegar hér var komið bárust ekki lengur stöðluð svör, á íslensku, frá Snjallkaupum og mig fór að gruna (hafði svosem grunað það lengur), að hér væri bara hreint ekki um að ræða fyrirtæki sem starfar hér á landi.  Ég kíkti því í fyrirtækjaskrá og komst þar að því að Snjallkaup ehf  var úrskurðað gjaldþrota fyrir einum 10 árum.  Hvar þetta núverandi Snjallkaup er til húsa í veröldinni, hefur mér ekki tekist að finna neitt um. 

Þegar Snjallkaup svaraði ekki tölvupóstum mínum á íslensku, nema með stöðluðum hætti, ákvað ég að skella mér yfir á tungu Shakespeare's, enda gat ég hreint ekki hugsað mér, að gefast bara upp og láta einhverja kóna hafa af mér pening (ISK14.680), ekki háa upphæð, en upphæð samt ....

Ég, sem sagt sendi þetta á netfang Snjallkaupa:

3. sep kl 09.13

I really need an explanation of this. I ordered an item from "Snjallkaup".  Then I got this tracking number: RG026125626CN, which, to begin with, I couldn't find on tracking sites. A bit later I got this tracking number: LR179315267NL and followed that through the Netherlands to a post office in Kopavogur Iceland (this post office is in a different part of the country). When I contacted the Iceland Post about this, I was told that this package was not being sent to me, but to some woman by the name of Hugrún. This baffled me. 

This morning I tried to track the original tracking number: RG026125626CN, and according to Package Radar that package is still in China, as a matter of fact, and that it will be returned to the sender!!!. See here: 

 I need your explanation for all this and an assurance that I will get what I ordered from you. If not, I demand a refund, not  an INNEIGN in your store: 

regards Páll M Skúlason

 Í sem stystu máli rek ég þarna það sem á undan er gengið með þessi tvö rakningarnúmer og að LR179315267NL hefði tilheyrt pakka sem var ætlaður henni Hugrúnu í Kópavogi, en ekki mér. Sömuleiðis greini ég þeim frá því, að þegar ég fór að athuga með upprunalega rakningarnúmerið, RG026125626CN, kom í ljós, að hann var á leiðinni aftur til sendanda pakkans (hver eða hvar sem hann nú var eða er). Hann var þarna staddur í borginni Guangzhou á einhverri póstmiðstöð. 
Þarna sendi ég einnig þessar myndir af síðu PackageRadar - rakningarfyrirtækisins þar sem staða pakkanna tveggja kemur fram: annar í Guangzhoou í Kína og inn á Pósthúsinu í Kópavogi:

þetta sendi ég einnig til Póstsins:

3. sep kl. 09.26
Til póstsins:
Sæl Ég sendi hér afrit af pósti mínum til Snjallkaupa, þó ég ímyndi mér svo sem ekki að þið lítið á þetta sem ykkar mál.
Ég hafði samband við ykkur í gær [í spjalli, sjá ofar] vegna pakka til mín sem reyndist vera kominn í pósthúsið í Kópavogi. Þá fékk ég þær upplýsingar, að þessi pakki væri hreint ekki til mín, heldur einhverrar Hugrúnar. Ég er búinn að reyna að ná sambandi við Snjallkaup, án árangurs enn sem komið er.
Þegar pakkinn fór af stað frá Kína bar hann rakningarnúmerið RG026125626CN, en það breyttist svo á leiðinni og varð LR179315267NL. Hér er sem sagt um að ræða tvö rakningarnúmer á sama pakkanum og ég veit hreint ekki hverju ég á að trúa í þessum efnum. Ég læt fylgja hér með skjáskot frá Package Radar [myndin sem er hér fyrir ofan].
bkv pms

Ekkert heyrðist frá Snjallkaupum og ég ætlaði nú ekki að gefa mig:

4. sep kl 1800
Til Snjallkaupa
Hi, I'm still waiting for your response to my emails.

4. sep 1804
Why don't you answer emails?

Svo sendi ég skjáskot af síðu þeirra:

4. sep kl.18.36 

 

Þá er að standa við stóru orðin! 

Enn engin viðbrögð frá Snjallkaupum, en þetta fékk ég frá rakningaraðilanum, PackageRadar:

We have got an update for your package.
LR179315267NL
September 4
10:39 Package delivered
Pósthús Kópavogi, Iceland Post
See tracking info on PackageRadar.com

Thank you for using our service! If you have any questions or suggestions please visit our official forum.

Sem sagt, það var búið að afhenda pakkann. Það var á þessum degi sem Hugrún í Kópavogi fékk pakkann sinn. Þá lá það fyrir, en eftir stóð spurningin um örlög pakkans sem var með hitt rakningarnúmerið, RG026125626CN, sem enn var í Kína.

Daginn eftir þessa niðurstöðu fékk ég svo sendingu frá Póstinum:

5. sep kl 11.29
Daginn,
Sending RG026125626CN er stíluð á þig og er enn skráð væntanleg frá útlöndum. Við getum því miður ekki haft nein áhrif á hana fyrr en hún kemur til landsins.
Sending LR179315267NL er komin til landsins en er skráð á annan einstakling. Innihaldslýsing pakkans stemmir ekki við skjávarpann sem þú hyggst að fá til landsins.
Ég get því einungis bent þér á að hafa samband við sendanda, þar sem ábyrgðin er á þeim og við höfum ekki nánari upplýsingar.
Kær kveðja,
Finnur
Þjónustufulltrúi | Þjónustudeild - Akureyri

Ég er kurteis og brást við þessum upplýsingum:

5. sep kl 12.26
Takk fyrir svarið.
Ég sé ekki betur en þessi pakki sem hefur númerið RG026125626CN, sé enn á upphafsstað - ef það er þá eitthvað á bak við hann.
kv pms

Daginn eftir fékk ég síðan þetta frá honum Finni hjá Póstinum:

6. sep kl 09.23
Daginn,
Því miður getum við ekki haft áhrif á, né séð ítarlegar upplýsingar, um sendingar sem eru ókomnar til landsins. Því verð ég að benda þér á að hafa samband við sendanda.

Kær kveðja,
Finnur
Þjónustufulltrúi | Þjónustudeild - Akureyri

Ég freistaði þess þarna, að kæla mig aðeins niður og beið aðeins með næstu lotu, en hún hófst þann 9. september, þegar pakkinn með rakningarnúmerið RG026125626CN hafði verið óhreyfður í Guangzhou síðan 31. ágúst.:

9. september, kl 12.37  

Could you, please, explain to me why the projector, that I have paid for, is still in China?

Það voru engin viðbrögð, frekar en fyrri daginn. 

Það næsta sem gerðist var, að ég fékk tilkynningu frá PackageRadar rakningarfyrirtækinu:

11. sep kl 11.32
PackageRadar
We have got an update for your package.
RG026125626CN
September 10
20:12 Package delivered
Dongguan city, China Post
See tracking info on PackageRadar.com
Thank you for using our service! If you have any questions or suggestions please visit our official forum.

Jæja, þá lá það fyrir, að pakkinn minn, með skjávarpanum, hafði verið afhentur í Dongguan borg í Kína. Þar með hafði ég misst alla möguleika á að reyna að rekja  einhverja sendingu til mín. Ég varð auðvitað nokkuð pirraður (ekki í fyrsta skipti í þessu ferli) og skellti í næsta póst til Snjallkaupa:

11. sep kl 12.14
I found out this morning that my projector was delivered in Dongguan city in China, last night (see below).
Since I have already paid for the projector, I expect you to deliver it to me, which is reasonable, in my opinion. I live in Iceland, as you should be well aware of..
You have chosen not to answer my emails recently, which leads me to question your motives. Proof me wrong in having come to the conclusion that you are a fraud company.

Þarna greini ég sem sagt frá stöðu mála og gagnrýni skort á viðrögðum frá hendi Snjallkaupa. Jafnframt skora ég á þá að sýna mér fram á að sú skoðun mín, að um sé að ræða svikafyrirtæki, sé röng.

En, það bárust engin viðbrögð frá Snjallkaupum. Hér voru liðnir 18 dagar frá síðustu viðbrögðum. 

... segja þeir á vefsíðunni sinni.

Þegar hér var komið taldi ég nóg komið. Annaðhvort var að gefa þetta bara upp á bátinn, eða þá grípa til frekari aðgerða. Hvorn kostinn skyldi ég nú hafa valið?

Þetta fer að verða bein lýsing, en við sjáum hvað setur --- næst 😐

FRAMHALD  HÉR >>>>>

 

 

Eldri borgari kaupir skjávarpa (1)

Það er þannig, að ef þú ætlar að eiga viðskipti við vefverslun, þarftu að hafa vaðið fyrir neðan þig. 

Það var viðtal við gamla konu í Danmörku um daginn, í sjónvarpsfréttum. Hún var búin að fylla íbúðina sína af allskyns dóti sem hún hafði sankað að sér í viðskiptum við vefverslanir. Ástæðan sem hún gaf upp fyrir kaupunum var sú, aðallega, að það væri svo gaman að láta sig hlakka til að fá pakkasendingarnar og opna svo pakkana.  

Kannski fór eitthvað svona í gegnum huga minn, þann 13. ágúst síðastliðinn, þar sem enn einu sinni birtist, á samfélagsmiðli, auglýsing frá vefverslun sem bar nafnið Snjallkaup . Ég er viss um, að þér lesandi góður, þykir skjávarpinn hér vinstra megin bara skrambi flottur og ekki varð hann síðri þegar nánari upplýsingar um hann voru skoðaðar. 

Auðvitað velti ég fyrir mér, til hvers ég ætti nú að fara að kaupa mér skjávarpa. Hér innandyra er hreint ekkert pláss á veggjum til að sýna nokkurn hlut, hvað þá óskarsverðlaunamyndir í cinemascope, eða hvað sem það nú er. Til að gera langa sögu stutta, eftir að ég hafði sannfært sjálfan mig um að skjávarpinn myndi nýtast vel við hitt og þetta, skoðaði ég þetta fyrirtæki aðeins nánar (en ekki nógu nákvæmlega) og komst meðal annars að þessu:

Auðvitað klikkaði ég að að skoða þetta allt betur, t.d  hvernig hægt væri að ná sambandi við þetta fyrirtæki, öðruvísi en með tölvupósti.  

Hvað um það, þarna bauðst mér þessi frábæri skjávarpi á ISK14.680 og endaði á sannfæra sjálfan mig (ég á of auðvelt með það, reyndar) um, að ég yrði svo sem ekkert fátækari í peningalegu tilliti, við að tapa þessum krónum, ef þetta reyndist nú allt vera í plati. Ég myndi reyndar lenda í hópi fólks, sem hefur látið glepjast af gylliboðum á samfélagsmiðlum, en þá væri bara að taka því. 

Þetta fór nú bara harla vel af stað og ég mun hér freista þess að gera grein fyrir öllum þeim tölvupóstsendingum sem áttu sér stað í framhaldi þess að ég ýtti hnappin sem gaf til kynna, að kaup hefðu átt sér stað:

SNJALLKAUP
13. ágúst
Takk fyrir pöntunina!
Við erum að gera pöntunina þína tilbúna til sendingar. Við munum láta þig vita þegar hún hefur verið sent.

Gott, svo langt sem það náði.

Næsti póstur kom svo  þann 16. ágúst, og þá var ég aðeins að byrja að efast, en hann var svohljóðandi:

SnjallKaup™ <mailer@shopify.com

Your 6-digit code is:
911554
This code can only be used once. It expires in 15 minutes.
© SnjallKaup™
Engelbrecht LLC, 6527 Falls Lake Drive, Charlotte NC 28270, United States

Þarna þurfti ég að slá inn kóða til að komast að því hvernig skjávarpanum liði. Eftir notkun kóðans á viðeigandi stað, komst ég að því að póstrakningarnúmerið sem þar var að finna, vísaði ekki á neina sendingu. Þetta númer var:

RG026125626CN

Rakningarnúmerið skiptir máli upp á framhaldið, en þarna var mér orðið ljóst, að sendingin væri á leiðinni frá Kína, hvorki meira né minna og ég sem var búinn  að sjá fyrir mér "krúttlegt" lítið fyrirtæki í höfuðborginni.

Nú úr því rakningarnúmerið virkaði ekki sendi ég þeim Snjallkaupsmönnum póst:

16. ágúst

Sæl Ég frétti ekkert af þessum skjávarpa sem ég festi kaup á hjá ykkur. Rakning virkar ekki og nú er ég smám saman að verða fullur efasemda. Vonandi eiga þær ekki við rök að styðjast.

kv pms

Ég fékk svar sem var svona:17. ágúst kl 00,55

Hæ
Sendingin er á leiðinni og ætti hún að koma bráðlega, engar áhyggjur.
Við afsökun þessa töf og vonum við að skilningur berist á því. Starfsmenn hafa verið í sumar fríi.
Kær kveðja,
SnjallKaup

Mér var auðvitað létt og svaraði því:  

17. ágúst kl 07.23
Fínt er. Þá get ég verið rólegur :)
kv pms

Það næsta sem gerðist var þetta:

17. ágúst kl 08.48
SnjallKaup™
Order #2497
Sendingin þín er á leiðinni. Fylgstu með sendingunni þinni.
tracking number: RG026125626CN

... en það gerðist fátt og því fylgdist ég, fullur efasemda, grannt með ferðum sendingarinnar. Þar sem rakningarþjónustan fann ekki uppgefið rakningarnúmer, sendi ég þetta á Snjallkaup: 

20. ágúst kl 07.08
Eitthvað lítið að gerast.....

 ásamt þessari mynd frá rakningarþjónustunni:

... þar sem fram kemur að þar á bæ séu engar upplýsingar um þetta rakningarnúmer.

Enn létu Snjallkaupsmenn svo lítið að virða mig viðlits og sendu mér þennan póst:

 21. ágúst kl. 01.07

Hæ,
Sendingin er á leiðinni og ætti hún að koma bráðlega, engar áhyggjur.
Við afsökun þessa töf og vonum við að skilningur berist á því. Starfsmenn hafa verið í sumar fríi.
Kær kveðja,
SnjallKaup

 

.. en þetta var nánast orðrétt sama svar og ég hafði áður fengið og enn jukust grunsemdir mína um maðk í mysunni.

23. ágúst kl 02.52
SnjallKaup™
Order #2497
Your shipping status has been updated
The following items have been updated with new shipping information.
DHL tracking number: LR179315267NL

Hér var, sem sagt komið til sögunnar nýtt rakningarnúmer LR179315267NL og ég fann ekkert um pakka með því númeri og sendi því þetta:

23. ágúst kl 07.06
Þetta sendingarnúmer finnst ekki á rakningarsíðum.

Við þessu kom kunnuglegt svar:

24 ágúst, kl 00.28
Hæ,
Sendingin er á leiðinni og ætti hún að koma bráðlega, engar áhyggjur.
Við afsökun þessa töf og vonum við að skilningur berist á því. Starfsmenn hafa verið í sumar fríi.
Kær kveðja,
SnjallKaup

Þegar hér var komið, gat ég fylgst með ferðum pakkans, sem þá var sagður vera kominn til Hollands og í vinnslu þar í nokkra daga. Á endanum var hann sagður kominn til Íslands og farinn í vinnslu þar.  Þar kom, að ég fékk tilkynningu frá Póstinum um að pakkinn væri tilbúinn til afhendingar á pósthúsinu í Kópavogi.  Þetta kom mér á óvart í tvennu tilliti: Ég hafði ekki verið rukkaður um toll og pakkinn fór í Kópavog en ekki á Selfoss.  

Þarna fór ég á spjallsíðu hjá Póstinum og þar fékk ég þessi viðbrögð:

Þarna fékk ég að vita að viðtakandi sendingarinnar væri Hugrún nokkur, sem ætti heima í Kópavogi. Með þessar upplýsingar snéri ég mér enn til Snjallkaupa:

2. sep kl 16.43
Sæl enn
Nú er pakkinn kominn til landsins, það á að vera búið að reikna út toll og hann er sagður vera kominn á pósthúsið í Kópavogi - en ég bý nú á Selfossi. Það á að vera búið að senda mér tilkynningu um hann, en ég hef enga fengið. Það á að vera búið að reikna út aðflutningsgjöld, en ég hef ekkert fengið um það. Ég er búinn að hafa samband við Póstinn og þeir halda enn, að ég heiti Hugrún ...
Þetta er dularfullt mál.
pms

Þegar hér var komið hætti ég að fá viðbrögð frá Snjallkaupum og hef ekkert heyrt frá þeim síðan. Ég var samt ekki hættur, en frá því greini ég næst. 

FRAMHALD >>>>> HÉR

Jósefína Friðriksdóttir - minning

Við Jósefína kenndum saman í Reykholtsskóla við upphaf 9. áratugarins, þegar ég var að stíga fyrstu skref mín sem kennari og það gekk allavega hjá mér. Hún var rúmum 10 árum eldri en ég og orðinn reynslubolti á þeim starfsvettvangi sem kennslan er. Árin síðan þá eru nú orðin ansi mörg og margt hefur gerst í millitíðinni. 

Það bar ekki skugga á samstarf okkar í Reykholti, utan einu sinni og sá skuggi var stór og hefur einhvernveginn fylgt mér alveg síðan. Ég stóð þá frammi fyrir siðferðilegri klemmu, sem var þannig að báðir kostir voru slæmir. Kosturinn sem ég valdi hafði áhrif á samband okkar starfsfélaganna, þó svo ekkert hefði Jósefína sjálf gert á minn hlut. Ég viðurkenni það fúslega, að lengi síðan hef ég verið hálf miður mín vegna þess sem þarna varð til að varpa skugga á ágætt samstarf.  Ef ég, hinsvegar, stæði aftur frammi fyrir svipaðri klemmu, á ég síður von á að kæmist að annarri niðurstöðu.

Jósefina og fjölskylda hennar fluttu á Selfoss, eftir dvöl sína í Laugarási og öll tengsl við hana rofnuðu. Það var svo ekki fyrr en við Dröfn fluttum á Selfoss fyrir fjórum árum að Jósefína varð aftur á vegi okkar, þá búin að missa bæði son sinn og eiginmann. Hún hafði þá, meðal annars, tekið virkan þátt í fornsagnalesturshópi félags eldri borgara og fyrir dyrum stóð mikil ferð á Vestfirði, eftir að hópurinn hafð þrælað sér í gegnum Gísla sögu (held ég). Þá hafði Jósefína, að fyrra bragði samband til að athuga hvort við vildum ekki slást í hópinn, sem við þáðum, að sjálfsögðu. Það varð reyndar ekkert úr ferðinni vegna dálítillar veiru sem setti ýmislegt úr skorðum.  

Svo urðum við Jósefína samnemendur í fornlestrarhópnum og aldrei fann ég fyrir kala af hennar hálfu í minn garð. Viðmót hennar til mín var alltaf hlýtt og fyrir það er ég þakklátur. 

Ég get ekki látið hjá líða að nefna það, að stjórnmálaskoðanir Jósefínu höfðuðu sannarlega til mín og hún gat verið ansi beitt á stundum, en ávallt réttsýn.

Genginn er ágætur samferðamaður.

Jósefína lést þann 25. júní, og útför hennar er gerð frá Fossvogskirkju í dag.

Laugarás: Æ, ég veit ekki....

Heilsugæslustöðin í Laugarási
virðist ekki að hruni komin.

Nú hefur forstjóri HSU skrifað annan pistil á vefinn island.is, til að upplýsa okkur um að heilsugæslan verði flutt að Flúðum næsta vor. Forstjórinn var búinn að þessu og lítil ástæða til að endurtaka það sem þegar hefur verið sagt. Vissulega bætir hann við skrifin ágripi af sögu heilsugæslu í uppsveitum. Þar ýjar hann að því, að þegar Skúli Árnason, fyrsti læknir héraðsins, lét af störfum og það þurfti að finna nýjan stað fyrir læknissetur, að ekki hafi það gengið hnökralaust fyrir sig. Það gekk hreint ekki hnökralaust fyrir sig.  

Hér er reiknað með því, að menn hafi séð fyrir sér, að í uppsveitum yrðu tvö læknishéruð, annað vestan Hvítár og þá líklegast með læknissetri í Grímsnesi og hitt austan árinnar, mögulega með aðsetri í Hrunamannahreppi. (af laugaras.is)

Það var þarna uppi ágreiningur, sem var leystur með því að kaupa jörðina Laugarás í Biskupstungum. Draumurinn um að fá sitt læknissetur, eða heilsugæslu, hefur lifað allar götur síðan austan Hvítár og það lítur út fyrir að hann fái nú að rætast - hver veit?

Forstjórinn fer í framhaldinu í það að reyna að klóra yfir blekkingarnar sem beitt var sem megin rökum fyrir þessum flutningi. Þarna finnst mér mikil lágkúra vera borin fram. Svo heldur hann áfram:

Í ljósi þessa var því mikilvægt að leggja mat á það hvort núverandi staðsetning heilsugæslunnar væri hentug til framtíðar eða hvort vænlegra væri að færa heilsugæsluna í þéttari byggðarkjarna og á sama tíma efla þjónustuna við íbúa uppsveita Suðurlands.

Í ljósi hvers - að það var svo dýrt að gera við húsið í Þorlákshöfn!?  Þá þurfti að meta hvort vænlegra væri að flytja heilsugæslustöðina í Laugarási í "þéttari" byggðakjarna?  Mér er fyrirmunað að skilja þessa röksemdafærslu og þegar forstjórinn klikkir svo út með því að segja: "og á sama tíma efla þjónustuna við íbúa uppsveita Suðurlands"  tekur steininn úr, að mínu mati, að sjálfsögðu. Hvernig ætlar forstjórinn að efla heilsugæslu í uppsveitum með þessu? Á kannski bara að vera svona lítil, "kósý" stöð á Flúðum fyrir Hreppamenn, en aðrir á svæðinu fái að njóta fádæma góðrar þjónustunnar á Selfossi? 

 Ekki meira um pistil forstjórans.

Fyrir þau ykkar sem þetta kunna að lesa, en vita kannski ekki alveg hvernig landið liggur í uppsveitum Árnessýslu, læt ég hér fylgja kort af uppsveitunum sem sýnir leiðirnar sem liggja frá byggðakjörnum í uppsveitunum, í heilsugæsluna í Laugarási.  Vegalengdir frá Laugarvatni, Flúðum og Árnesi, í Laugarás, eru um 25 km. Til annarra byggðakjarna er hún styttri.

Svo læt ég fylgja sama kort, en nú með þeim leiðum sem íbúar í uppsveitum þyrftu að fara frá byggðakjörnum í fyrirhugaða heilsugæslu á Flúðum.

Hér er mynd sem sýnir íbúafjölda í byggðakjörnum í uppsveitunum:

Hér er kort sem sýnir sveitarfélagamörk í uppsveitum.

Grímsnes- og Grafningshreppur á sneið innan Bláskógabyggðar, sem hefur því miður annan lit.

 

Hér er súlurit sem tilgreinir íbúafjölda í sveitarfélögunum 4 þann 1. jan., 2024, en þessar upplýsingar er að finna á vef Hagstofunnar.

Loks er hér súlurit sem tilgreinir íbúafjölda í Hrunamannahreppi, annarsvegar og hinna þriggja sveitarfélaganna hinsvegar.

Mér finnst upplýsingarnar hér fyrir ofan sýna fram á það, að það er enginn faglegur grunnur fyrir því að flytja heilsgæslu frá Laugarási á Flúðir, en það dregur sjálfsagt hver sína ályktun af þeim.

Ég viðurkenni, að ég nenni ekki að fara í meiri spurningaleik við forstjórann, enda mun hann ekki svara mér þannig, að ég sannfærist um að faglega hafi verið staðið að þessu máli. Í mínum huga er það ljóst að það var makkað um þetta bakvið tjöldin og síðan tínd til einhver rök, sem engu vatni virðast halda.

Ég ætla ekki að fara að eyða frekari tíma í þetta mál, en mun auðvitað fylgjast grannt með, hvort fyrirsvarsmenn í uppsveitum, sem lýsa sig andvíga þessum flutningi, ætla að láta þetta ganga yfir, án þess að leita færra leiða til að láta fara fram mat á þeirri málsmeðferð sem hér er um að ræða.

Góða helgi.

(Ég er fæddur og uppalinn í Laugarási og bjó þar síðan í um 40 ár. Nú bý ég á Selfossi. Undanfarin 12 ár hef ég unnið að vefnum um Laugarás: https://www.laugaras.is/ )

Það nýjasta sem ég hef skrifað um þennan fyrirhugaða flutning Heilsugæslunnar er: 

Laugarás: Fagmennska, eða annað  

14. júní, 2024

       Litlir kallar og litlar kellingar 

7. janúar, 2024

Laugarás: Fagmennska, eða annað.

Þann 13. júní birtist á island.is island.is  tilkynning frá Heilbrigðisstofnun Suðurlands þar sem greint er frá því á vorið 2025 verði heilsugæslan fyrir uppsveitir Árnessýslu, flutt frá Laugarási að Flúðum. 

Hér er  mynd sem sýnir  hvar Laugarás er og hvar Flúðir er að finna. 

Hér fyrir neðan birti ég einstaka hluta þessarar tilkynningar, og við þá geri ég mínar athugasemdir og varpa fram spurningum. 

Tilkynningin hefst á þessu:

Í ljósi stöðugrar uppbyggingar og fjölgunar íbúa í uppsveitum Suðurlands hefur Heilbrigðisstofnun Suðurlands (HSU) ákveðið að flytja starfsemi heilsugæslunnar í nýtt og nútímalegt húsnæði á svæðinu.

Hvaða nútímalega húsnæði er þarna um að ræða? Er það hannað og byggt með þarfir heilsugæslu í huga?  Er það nýtt, í ljósi þessarar athugasemdar sem birtist á Facebook:   "En kofinn á Flúðum er eldgamalt hús sem á að breyta í heilsugæslu og hentar engan veginn til starfans. Texti um að þetta þjóni sérstaklega nútíma kröfum er þvílík endemis lygi að ég hef varla séð annað eins haft eftir opinberum aðila." (Ólafur Ragnarsson).  

Um ástand húsnæðis heilsugæslunnar í Laugarási er eftirfarandi einnig á finna í athugasemdum á Facebook: "Hins vegar er það fásinna að kenna 25 ára gömlu, sérhönnuðu húsnæði um. Eina sem hægt er að benda á er kannski uppsöfnuð viðhaldsþörf ef eitthvað er." (Jónas Yngvi Ásgrímsson)

Ég skal alveg viðurkenna, að fjölgun íbúa í Laugarási hefur látið á sér standa og að þar skortir ýmsa þjónustu aðra en heilsugæsluna, en það er sérstakt mál, sem ég mun fjalla um, eina ferðina enn, í lokin. 

Í janúar síðastliðnum auglýsti FSRE eftir húsnæði til að hýsa heilsugæslu HSU í uppsveitum Suðurlands. 

Hvað kallaði á þessa auglýsingu? Hver átti frumkvæðið að því að þörf var talin á henni?  Svör við þessum spurningum skipta ansi miklu máli fyrir umræðuna. Er frumkvæðið komið frá ráðuneytinu, stjórn HSU, eða Hrunamannahreppi? Sem sagt: Hvernig þessi umræða fór af stað? 

Þrjú tilboð bárust og eftir ítarlegt mat á tilboðunum var ákveðið að ganga til samninga við Hrunamannahrepp um að leigja húsnæði undir heilsugæslu HSU á Flúðum. 

Hver var munurinn á þessum tilboðum? Hvað fólu þau í sér?  Hvernig fór þetta "ítarlega" mat fram,  hvaða aðilar stóðu að því og hverjar voru forsendurnar sem gengið var út frá?  Hvaða þættir voru það sem réðu úrslitum? 

Nýja húsnæðið býður upp á fjölmarga ávinninga fyrir samfélagið. Það er ekki aðeins fjárhagslega hagkvæmara en núverandi húsnæði, heldur verður það einnig sérhannað til að mæta nútímakröfum heilbrigðisþjónustu. 

Í hverju felast þessir "fjárhagslegu ávinningar"?  Hvaða kröfum um "nútíma heilbrigðisþjónustu" fullnægir 28 ára gamalt hús heilsugæslunnar í Laugarási ekki?

Heilsugæslustöðin í Laugarási, sem var vígð árið 1997 (mynd úr safni Jóns Eiríkssonar) fengin á  laugaras.is  - en þar er að finna mikið af myndum frá vígslunni.

Með betri aðstöðu og þjónustu tryggir HSU að heilbrigðisþjónusta svæðisins sé ávallt í samræmi við þarfir íbúa.

Hvernig er sú niðurstaða fengin, að með flutningi heilsugæslunnar verði tryggara en áður, að þjónustan sé í "samræmi við þarfir íbúanna"?  Þarfir hvaða íbúa er þar um að ræða - einhverra ákveðinna umfram aðra?

Staðsetningin á Flúðum leggur jafnframt grunn að frekari þjónustutækifærum, þar á meðal möguleika á opnun nýs apóteks.

 "Frekari þjónustutækifærum?"  Sá aðili sem rak apótekið í Laugarási gafst upp á rekstrinum Hvað liggur fyrir um að lyfjakeðja sé tilbúin að setja upp apótek á Flúðum?

Flutningurinn mun einnig stuðla að bættu samstarfi við björgunarsveitir og aðra viðbragðsaðila sem eru með aðsetur á Flúðum, sem er mikilvægt fyrir öryggi og velferð íbúa.

Þarna er um fremur fátækleg rök að ræða, auðvitað. Nánast rökleysa og bendir bara til þess, að verið sé að grípa í hálmstrá.  Samkvæmt vef Landsbjargar eru þrjár björgunarsveitir í uppsveitum, aðrar en Björgunarfélagið Eyvindar, en þær eru Björgunarsveit Biskupstungna, sem er í Reykholti, Björgunarsveitin Ingunn á Laugarvatni og Hjálparsveitin Tintron á Borg í Grímsnesi. 

Þetta framfaraskref er liður í stefnu HSU um að tryggja að íbúar í uppsveitum Suðurlands hafi aðgang að heilbrigðisþjónustu sem mætir þörfum nútímans. 

Það vantar útskýringu á því hvert framfaraskrefið er, fyrir uppsveitir Árnessýslu. Þá á ég við uppsveitirnar sem heild, ekki bara afmarkaðan hluta þeirra. 

Það vantar útskýringu á því hvernig þessi flutningur tryggir betri aðgang íbúa í uppsveitum Árnessýslu.

Það vantar útskýringu á því hverjar "þarfir nútímans" eru, sem verða betur uppfylltar með flutningnum.

Með því að flytja heilsugæsluna á Flúðir er HSU ekki eingöngu að bæta aðstöðu heilbrigðisþjónustunnar, heldur er einnig verið að skapa öflugri grunn fyrir framtíðarþróun heilbrigðisþjónustu HSU í uppsveitum Suðurlands.

Hvernig  mun flutningurinn bæta "aðstöðu heilbrigðisþjónustunnar"?

"Skapa öflugri grunn fyrir framtíðarþróun heilbrigðisþjónustu HSU í uppsveitum Suðurlands."  

Fyrir mér segir þessi röksemd bara nákvæmlega ekki neitt. Er búið að móta einhverja framtíðarþróun að þessu leyti? Hver er hana að finna, ef svo er? Í hverju felst þessi framtíðarþróun? 

Flutningur heilsugæslunnar er fyrirhugaður vorið 2025 og mun nánari tímasetning verða tilkynnt þegar nær dregur.
Díana Óskarsdóttir, forstjóri

Þá er ég búinn að fara í gegnum tilkynningu um þennan flutning, en hann skilur eftir helling af spurningum.  Auðvitað fagna íbúar Hrunamannahrepps því að vera komnir með heilsugæsluna "heim", eins og hefur lengi verið draumurinn. Megi þeir njóta hennar vel og allrar þeirrar þjónustu, sem hún mun njóta góðs af og styrkja.  

Er ef til vill betur heima setið en af stað farið? 

Hver verða jákvæð áhrif þessa á íbúa uppsveitanna, aðra  en íbúa Hrunamannahrepps? 

Ef reyndin verður nú sú, að flutningurinn verði til þess að íbúar uppsveitanna, annarra en íbúa Hrunamannahrepps, muni í vaxandi mæli, eða alveg, telja henta sér betur að sækja læknisþjónustu á Selfoss, er þá heilsugæslan á Selfossi undir það búin?  Ég bý þar og veit að þar er löng bið eftir læknisþjónustu. 

Hvað felst í nútímavæðingunni, sem ætlað er að taka á þeirri framtíðarþróun?

Apótekið, sem er notað sem ein stóru röksemdanna í málinu, hvarf úr Laugarási vegna þess að það var ekki rekstrargrundvöllur. Hvað segir um það í framtíðaráætlunum HSU á nýjum stað?

Með ákvörðum um flutning heilsgæslunnar frá Laugarási að Flúðum er búið að stuðla enn frekar að klofningi í uppsveitum, í stað þess að  þær sameinist. Er það virkilega einhverjum til góðs? 

Ég er búinn að varpa fram, hér að ofan,  mörgum spurningum um þennan fyrirhugaða flutning. Mig grunar, að ef stjórnsýslan sem um hann hefur fjallað, getur ekki sýnt fram á, svo óyggjandi sé, að allt þetta ferli hafi verið faglegt, þannig að það þoli dagsljósið, muni óánægja grassera áfram. Það er talað um spillingu, sem tengist tveim ríkisstjórnarflokkanna, það er talað um pólitísk sambönd, fjölskyldutengsl og jafnvel skiptimynt í samningum um framgang mála innan ríkisstjórnarinnar.  

Það kæmi mér ekki á óvart, að þau orð hafi fallið einhverntíma í þessu ferli að það væri alveg hægt að standa af sér nokkurra daga hvassviðri á samfélagsmiðlum og halda svo bara áfram ótrauð. 

"Þegjum bara, þetta gengur yfir" - sem það gerir því miður ansi oft hér á landi.

---------------------------------------

Hér ofar, sagði ég: "Ég skal alveg viðurkenna, að fjölgun íbúa í Laugarási hefur látið á sér standa og að þar skortir ýmsa þjónustu aðra en heilsugæsluna, en það er sérstakt mál, sem ég mun fjalla um, eina ferðina enn, í lokin. "

Ég er reyndar búinn að fjalla ítrekað um ástæður þess, að Laugarás hefur átt skárri tíma og veit, svei mér ekki, hvort ég ætti að að fara endurtaka mig of míkið um það. Ef einhver hefur ekki lesið skoðanir mínar á því máli (flestir, líklegast) bendi ég til dæmis á  þennan pistil og  þennan .

Biskupstungnahreppur, Bláskógabyggð og Stjórnarnefnd heilsugæslunnar í Laugarási (Oddvitanefndin), hafa, með sinnuleysi, áhugaleysi og beinlínis andstöðu við uppbyggingu í Laugarási, skapað þá stöðu sem nú er uppi.

Enginn veit hvað átt hefur fyrr en misst hefur. Þar er svo.

-----------------------------------------

Bakgrunnsefni:

Á vefnum laugaras.is er ítarleg umfjöllun um Laugaráslæknishérað og heilsugæsluna í Laugarási. Hér eru hlekkir á brot af því:

Saga Laugaráslæknishéraðs

Um störf og verkefni Stjórnarnefndar læknishéraðsins (oddvitanefndarinnar)

Um heilsugæslustöðvar í Laugarási

Uppfært 16. júní:

Ég hef nú sent erindi á heilbrigðisráðherra, þingmenn kjördæmisins og formann og varaformann velferðarnefndar Alþingis, með hlekk á þennan pistil.