Hér var, sem sagt, um að ræða árlega hestaferð þessa hóps, en ekki varð annað skilið en hún hefði gengið mikið út á grillveislur og dekkuð borð á flestum áningarstöðum. Ég ætla ekki að reyna að gera grein fyrir ferðasögunni, því ég þykist viss um að Benedikt muni skella henni inn, innan skamms.
Ég var hinsvegar í hópi fólks sem fór til móts, í grennd við Steingrímsstöð í Grafningi. Ekki reyndist ferðaáætlunin fullkomin, en þar kom samt að sást til hópsins í fjarska og kennsl voru borin á trússinn. Upp úr því leið ekki á löngu áður en mótið átti sér stað í ólýsanlegu flugnageri. Ég tók mér það hlutverk að smella myndum af moldarbrúnni Bergþóru ásamt öðrum þátttakendum, ásamt að sjálfsögðu hrossum í baráttu við flugur. Megin tilgangur minn með þessari ferð var að sjálfsögðu að ná loks mynd að þeim rauðnösótta, en svo fór um það sem fór. Sá litförótti naut þess af þeim sökum að falla ekki í skuggann.
Myndir eru hér.Hot, hot á hesti
Lagboði: Sólskríkja mín situr...
SvaraEyðaHefur myndað hesta, menn
og hulduvætti
flugur, net
og frúna' að vanda
föðurinn - með sínum anda.
Bloggskapur um hestaferðamyndatöku
H.Ág.
Epilogus:
(Frúin dátt við flugum hló
og fannst þær sætar.
Strauk þeim blítt
um bak og maga
blessar hún þær alla daga)
Sæll Páll.
SvaraEyðaÞetta eru mjög fínar myndir hjá þér, verst með helvítis fluguna.
Hér kemur ferðasagan:
Undirbúningur ferðarinnar hófst á því að járnaðir voru 25 hestar og lagt af stað frá Laugarási þann 18. júlí sl., með 29 hesta, 10 manns og 2 trússbíla. Riðið var að Votumýri á Skeiðum til Kollu frá Skálholti og Gunnars. Þaðan lá ferð okkar í gegnum Selfoss að Hjarðarbóli í Ölfusi. Til gamans má geta þess að hópurinn fékk aðstoð lögreglu við að komast yfir Ölfursárbrú. Frá Hjarðarbóli var riðið í Hveragerði þar sem Gylfi múrari kom á móti okkur. Síðan voru farnir gömlu Kambarnir upp á Hellisheiði og riðið með Hengladalsá og með Henglinum. Komum við þar að fólki sem var að "bjarga" Íslandi í tjöldum (Saving Iceland). Komum við síðan að gerspilltri náttúru með spúandi broholum. Var þetta ekki vinsælt hjá ferfætlingunum. Geymdum við hrossin í Hveradölum í góðum kofa og mannfólkið fór í höfuðborgina. Haldið var áfram daginn eftir til höfuðborgarinnar og fengum okkur pulsu í Litlu-Kaffistofunni, frekar spes. Fengum svo að geyma hrossin í gerði í Víðidalnum í Rvk hjá Hirti Bergstað. Daginn eftir lóðsaði heimamaðurinn Erlendur Óli okkur síðan yfir í Mosfellssveitina að bæ sem heitir Hrísbrú, þar geymdum við hrossin yfir nóttina og enn héltu menn til höfuðborgarinnar til hvílu. Daginn eftir var haldið heim á leið og riðið að Fellsenda, þaðan yfir Mosfellsheiði (þar hringdir þú í mig) að Jórutind og niður Jórukleif og að Nesjavöllum þar sem við gistum og fórum í frekar slepjulega heita potta. Næsta morgun var lagt af stað og riðið að Villingavatni og þaðan beint að Steingrímsstöð, þar sem við hittum ykkur. Síðan var farið beint upp fyrir Kaldárhöfða og flugan flúin og Driftin riðin að Kringlumýri þar sem við gistum. Ákveðið var að reka af stað síðasta daginn (þá teyma menn ekki) og rekið niður að Þóroddsstöðum. Þar var allt sett í taum og riðin skógræktin að Mosfelli, framhjá Seli og í Laugarás. Þar með var lokið enn einni frábærri Systraferð Vatnsleysusystra.
Kveðja, BS